ബംഗാൾ ഉൾക്കടലിൽ രൂപംകൊണ്ട അർണബ് ചുഴലിക്കാറ്റ് (Cyclone Arnab)ശക്തിപ്രാപിക്കുന്നു. ചുഴലിക്കാറ്റ് അതിതീവ്ര ചുഴലിക്കാറ്റായി മാറാൻ സാധ്യതയുണ്ടെന്ന മുന്നറിയിപ്പിനെത്തുടർന്ന് തീരദേശ സംസ്ഥാനങ്ങളിൽ ജാഗ്രത ശക്തമാക്കി. മുൻകരുതൽ നടപടിയുടെ ഭാഗമായി ഒക്ടോബർ 27, 28 തീയതികളിലെ 53 ട്രെയിൻ സർവീസുകൾ സൗത്ത് കോസ്റ്റ് റെയിൽവേ റദ്ദാക്കി. യാത്രക്കാർ സ്റ്റേഷനുകളിലേക്ക് പുറപ്പെടുന്നതിന് മുൻപ് ട്രെയിനുകളുടെ സമയക്രമവും സർവീസ് വിവരങ്ങളും പരിശോധിക്കണമെന്ന് റെയിൽവേ നിർദേശിച്ചു. അതേസമയം ചുഴലിക്കാറ്റിനെ നേരിടാനുള്ള മുന്നൊരുക്കങ്ങളുടെ ഭാഗമായി ഒഡീഷയിലെ ഗജപതി ജില്ലയിൽ 210 ഗർഭിണികളെ വിവിധ കമ്മ്യൂണിറ്റി ഹെൽത്ത് സെന്ററുകളിലേക്കും പ്രാഥമികാരോഗ്യ കേന്ദ്രങ്ങളിലേക്കും മാറ്റി. ഗർഭിണികൾക്ക് ആവശ്യമായ വൈദ്യസഹായം ഉറപ്പാക്കുകയാണ് നടപടിയുടെ ലക്ഷ്യമെന്ന് ജില്ലാ കളക്ടർ അക്ഷയ് സുനിൽ അഗർവാൾ അറിയിച്ചു. ആന്ധ്രാപ്രദേശിലും ഗർഭിണികളെ ആശുപത്രികളിലേക്കും ആരോഗ്യകേന്ദ്രങ്ങളിലേക്കും മാറ്റുന്നതിനുള്ള ക്രമീകരണങ്ങൾ പുരോഗമിക്കുകയാണ്.
ചുഴലിക്കാറ്റിന്റെ സ്വാധീനത്തിൽ ആന്ധ്രാപ്രദേശ്, ഒഡീഷ, പശ്ചിമബംഗാൾ, തമിഴ്നാട് തുടങ്ങിയ സംസ്ഥാനങ്ങളിൽ ശക്തമായ കാറ്റിനും മഴയ്ക്കും സാധ്യതയുണ്ട്. കേരളത്തിലും കനത്ത മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. ചുഴലിക്കാറ്റ് കിഴക്കൻ തീരത്തേക്ക് അടുക്കുന്ന സാഹചര്യത്തിൽ ഔദ്യോഗിക കാലാവസ്ഥാ മുന്നറിയിപ്പുകൾ പാലിക്കാനും ആവശ്യമായ മുൻകരുതലുകൾ സ്വീകരിക്കാനും അധികൃതർ നിർദേശിച്ചു.
